சொல் இலக்கணம்
சொல் : ஒரு எழுத்து தனித்து நின்றோ பல எழுத்துக்கள் சேர்ந்தோ பொருள் உணர்த்துமாயின் அவை சொல் எனப்படும். சொல், மொழி, பதம், கிளவி என்பவை சொல் ஒரே பொருளை உணர்த்தும் பல சொற்களாகும்.
சொல்லின் வகை : சொற்களை பொதுவாக இலக்கண வகையில் பெயர்ச்சொல், வினைச்சொல், இடைச்சொல், உரிச்சொல் என 4 வகையாக பிரிக்கலாம்.
பெயர்ச்சொல்: ஏதேனும் ஒன்றின் பெயரை குறிக்கும் சொல் பெயர்ச்சொல் எனப்படும். ( உ.ம் ) பாரதி, பள்ளி, காலை, கண், நன்மை, ஓடுதல்.
பெயர்ச்சொல் 6 வகைப்படும். அவை 1. பொருட்பெயர் 2. இடப்பெயர் 3. காலப்பெயர் 4. சினைப்பெயர் 5. பண்புப்பெயர் (அ) குணப்பெயர் 6. தொழிற்பெயர்.
பொருட்பெயர் : பொருள்களின் பெயரை குறிக்கின்ற பெயர்ச்சொல் பொருட்பெயர் எனப்படும். இது உயிருள்ள பொருள்களையும் உயிரற்ற பொருள்களையும் குறிக்கும். ( உ.ம் ) புத்தகம் , மனிதன், யானை, மரம், மலர்விழி, நாற்காலி.
இடப்பெயர் : இடத்தின் பெயரை குறிக்கின்ற பெயர்ச்சொற்கள் இடப்பெயர் எனப்படும். ( உ.ம் ) பள்ளி, குளம், இல்லம், வீதி, ஈரோடு.
காலப்பெயர் : காலத்தின் பெயரை உணர்த்துகின்ற பெயர்ச்சொற்கள் காலப்பெயர் எனப்படும். (உ.ம் ) நொடி , வினாடி, மணி, நாள், மாதம், வருடம், சித்திரை, பெரும்பொழுது, குளிர்காலம், எதிர்காலம்.
சினைப்பெயர் (உறுப்பு) : உறுப்புகளை குறிக்கும் பெயர்ச்சொற்கள் சினைப்பெயர் எனப்படும். ( உ.ம் ) கனி, காய், தண்டு, இலை, கண், கை, இதயம், கொம்பு, வால்.
பண்புப் பெயர் (அ) குணப்பெயர் : பொருள்களின் பண்பை குறிக்கும் பெயர்ச்சொற்கள் பண்புப்பெயர் எனப்படும் . இது குணப்பெயர் எனவும் வழங்கப் பெறும். பண்புப் பெயர்கள் நிறம், வடிவு, அளவு, (எண்ணிக்கை) சுவை என்னும் நான்கு வகையே பெரும்பாலும் வரும்.
- நிறப்பண்பு : செம்மை, கருமை
- வடிவப் பண்பு : சதுரம், செவ்வகம், முக்கோணம், வட்டம்
- அளவு : இரண்டு, மூன்று கிலோமீட்டர்
- சுவை : இனிப்பு, புளிப்பு, கார்ப்பு, துவர்ப்பு
| பண்புப் பெயர் | விகுதிகள் |
| செம்மை | மை |
| தொல்லை | ஐ |
| மாட்சி | சி |
| மாண்பு | பு |
| நன்றி | றி |
| நன்று | று |
| நலம் | அம் |
| நன்னர் | அர் |
| திட்பம் | பம் |
| தீது | து |
| நன்கு | கு |
பண்புப் பெயர்கள் மேற்கண்ட விகுதிகளுடன் உ, நர், மன், இல் என்னும் விகுதிகளையும் பெற்று வரும். மை விகுதி பெரும்பான்மையாக காணப்படும்.